وسىناۋ ەل تاريحىنداعى اسا ءبىر ماڭىزدى كۇندەردىڭ تۇبىرىنە ۇڭىلگەن قاۋىم شىمكەنت قالاسىنداعى «قازاقستان حالقى اسسامبملەياسى» عيماراتىندا 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنى مەرەكەسىنە وراي دوڭگەلەك ۇستەل باسىندا باس قوستى.
جيىندا «نۇر وتان» پارتياسى شىمكەنت قالالىق فيليالى توراعاسىنىڭ ورىنباسارى باحادىر نارىمبەتوۆ قۇجات اياسىندا جۇزەگە اساتىن جۇمىستارعا كوپشىلىكتىڭ نازارىن اۋداردى.
- ەلباسىمىز قازاقستان حالقى اسسامبلەياسى اتتى دۇنيەجۇزىنىڭ بىردە-ءبىر ەلىندە كەزدەسپەيتىن بىرەگەي ينستيتۋت قۇرۋدىڭ جانە ونى جۇزەگە اسىرۋدىڭ نەگىزگى باستاماشىسى بولدى. سونداي-اق, «نۇر وتان» پارتياسى دا ەڭ العاش قۇرىلعان كۇنىنەن باستاپ پرەزيدەنتىمىزدىڭ باستى كومەكشىسىنە اينالدى. سوندىقتان, ءبىز بۇگىن ەلباسىنىڭ جاڭا باستامالارىن ىسكە اسىرۋعا, بەرەكە-بىرلىكتى نىعايتۋعا قاتىستى ماسەلەلەردى بىرلەسە قاراپ, ءوزارا مەموراندۋمعا قول قويدىق. بۇل – ءبىزدىڭ «قازاقستان-2050» ستراتەگياسىن, ەلباسىنىڭ سوڭعى جولداۋلارى مەن «بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى» اتتى باعدارلامالىق ماقالالارىنداعى باستامالاردى ءتيىمدى جۇزەگە اسىرۋدا بىرلەسكەن جۇمىستارىمىزدىڭ باستى قۇجاتى بولادى, - دەدى ب.نارىمبەتوۆ.
ەلباسى وتكەن جىلى «نۇر وتان» پارتياسى ساياسي بيۋروسىنىڭ وتىرىسىندا پارتيا مەن قحا-نىڭ بىرلەسىپ جۇمىس ىستەۋى جونىندە ارنايى تاپسىرما بەرگەن بولاتىن. وسىعان وراي, «نۇر وتان» پارتياسى شىمكەنت قالالىق فيليالى مەن قالالىق قازاقستان حالقى اسسامبلەياسى جانە وتباسى, بالالار جانە جاستار ساياساتى باسقارماسىنىڭ باسشىلارى 2019 جىلعا ارنالعان بىرلەسكەن ءىس-شارالار جوسپارىن بەكىتىپ, ءوزارا ىنتىماقتاستىق جونىندە مەموراندۋمعا قول قويدى.
- 1 جەلتوقسان – قازاقستاندىقتار ءۇشىن ەرەكشە كۇن. ءدال وسى كۇنى قازاقستان حالقى تاريحي تاڭداۋ جاساپ, تاۋەلسىز ەلدىڭ تۇڭعىش پرەزيدەنتىن سايلادى. از ۋاقىتتىڭ ىشىندە قازاقستان تاڭداي قاقتىرارلىق تابىستارىمەن الەمگە تانىلدى. ەلدەگى ەكونوميكالىق-الەۋمەتتىك جانە ساياسي رەفورمالار, حالىقارالىق جانە وڭىرلىك باستامالار, جاھاندىق جاسامپاز ىستەرىمىزدىڭ بارلىعى نۇرسۇلتان نازارباەۆتىڭ ەسىمىمەن تىكەلەي بايلانىستى. جەتىستىكتەرىمىزدىڭ بارلىعى ەلباسى ۇستانعان بىرلىك پەن تۇراقتىلىق, ۇلتارالىق كەلىسىم ساياساتىنىڭ ارقاسىندا جۇزەگە اسقانىنا ەرەكشە نازار اۋدارۋىمىز ءتيىس, - دەدى جيىندا ءسوز العان شىمكەنت قالالىق قازاقستان حالقى اسسامبلەياسى توراعاسىنىڭ ورىنباسارى ءمۇراتالى قالمۇراتوۆ.
2019 جىل «جاستار جىلى» دەپ جاريالاندى. وسىعان وراي, بايانداما جاساعان قالالىق وتباسى, بالالار جانە جاستار ساياساتى باسقارماسىنىڭ باسشىسى جاندوس قالتاەۆ جاستار مەن وتباسى ينستيتۋتىن كەشەندى قولداۋ باعىتىنداعى جۇمىستاردى جۇمىلا جۇزەگە اسىرۋدىڭ ماڭىزدىلىعىن ايتتى.
ەركىن پىكىر الاڭىنا اينالعان جيىننىڭ سوڭىندا ەلباسىنىڭ ءومىر جولى تۋرالى بەينەفيلم كورسەتىلدى.
نۇرشات توكەن,
«ەگەمەن قازاقستان»
